قصيدة عديت النجوم

عديت النجوم بليل الفراگ
يون گلبي اونينه بصوت مسموع
هجرني النوم واني بين الاحزان
لان گلبي بهواهم دوم مخدوع
اريد اسال سؤال محير البال
على كلمن تطرق هيچ موضوع
ليش يضل حزين اليحب بخلاص
وتضل دوم اعله جفنه ادور الدموع
ماغلطان احس من گتلك اهواك
الك صدري حنان يفيض ينبوع
تحب تجرح شعوري بلا سبب دوم
من گدما تلوم الگلب مفزوع
حبيتك صدگ مودغش وياك
وشلت همك ثگيل وچتفي مخلوع
من گدما اسولف بيك للناس
حديثي يضل عليك بطول الاسبوع
خنت حبي تگلي بصلفه العين
وأنه حبي الك بعضامي مزروع
الك مرهف مشاعر طيب الذات
واگيد العشره لجلك من تجي شموع
اذا رايد تذلني بعشرتي وياك
الذنب ذنبي اعترف الثمن مدفوع
ياهو الي يصون العشره هاليوم
ويمد جرحها عله طوله وراسه مرفوع
لان تسوه العتب عاتبتك هواي
وأنه ادري العتب وياك مرفوع
من جمع اليدگ ظل صدري مخسوف
شتفيد اعله الصدر لودگت جموع
كل هذا واگلك الك مشتاگ
واذ احضنك اكسر بيك الضلوع

تحياتي لكم
واحد من الناس